14, మార్చి 2009, శనివారం

నేను సైతం శ్రీశ్రీ గారికి క్షమాపణలతో ...

నేను సైతం కులమతాలకు లొంగిపోయి ఓటు వేశాను
నేను సైతం నీతి లేని నాయకులనే ఎన్నుకున్నాను
నేను సైతం పచ్చనోట్ల జిలుగుబిలుగుల కమ్ముడుపోయాను
నేను సైతం దేశమాతకు లెక్కలేని తూట్లుపొడిచాను


శిశిర ఋతువే గ్రీష్మమైనా ధరణీతాపం గుర్తురాలేదే!
మంచుకొండలు కరిగిపోయినా రాతిమనసులో చలనమేలేదే!
లక్షలాది రూకలముందు భూమి విలువే తెలియనేలేదే!
నేను సైతం మానవాళి అంతానికి కారణమయ్యాను

లంచగొండులు డబ్బులడిగితే నాకునేనుగా ఒప్పుకోలేదా?
తక్కినవారిని సైతమీదారిలో వెళ్ళమనినే ప్రోత్సహించలేదా?
దేశవ్యాప్త మహమ్మారి అవినీతికినే కారణంకాదా?
నేను సైతం కోరి నీతిని హత్యచేసిన భ్రష్టుడనయ్యాను

సాటినరులే నేలకూలినా అంతరాత్మకి జాలిలేదసలు
నాకు ముఖ్యం ప్రపంచంలో నేను నా భార్య నా సుతులు
ఎక్కడైనా ఎప్పుడైనా కానరావే మానవుల వెతలు
నేను సైతాన్ జన్మనెత్తి నాకు నేనే శత్రువయ్యాను!

24 వ్యాఖ్యలు:

  1. నేను సైతం ఒక్క కామెంట్......

    రౌడీ రాజ్య ఆవేదన
    మత జాడ్య నివేదన
    ధనజాల ధరణిలో
    ఓడిపోయిన మానవత్వం.

    అలుపెరుగని ధరిత్రి
    భరించలేదా భ్రష్టులను,బాధాతప్తులను,
    బ్రహ్మాండ నాయకులను, బరితెగించిన మనుషులను?

    అరిచినా, కరిచినా,రాసినా,రచనల రక్కినా
    పోయేదేముంది?
    రెండు వాక్యాలు, రెండు సిరా చుక్కలు

    ఏమీచేయలేని దుస్థితిలో
    అంతర్జాల విపనిలో
    కుక్కలమై మొరుగుతున్నాము
    నక్కలమై ఊళ పెడుతున్నాము.

    ప్రత్యుత్తరంతొలగించు
  2. simply superb రౌడీ గారు.
    - ఒక సగటు స్వార్థపరుడు

    ప్రత్యుత్తరంతొలగించు
  3. బాగుంది బాసూ,

    త్యాగరాజ వారు కూడా ఇలానే బాధపడ్డారు, "దుడుకు గల" అని :)

    ప్రత్యుత్తరంతొలగించు
  4. well done.
    కాస్త శ్రద్ధ పడితే మాత్రల లెక్క కూడా మూలానికి తగినట్టు సాధించగలిగి ఉండేవారు.
    శ్రీశ్రీని అనుకరించడంలో ఉన్న మజా అంతా ఆ తూగులోనే కదా!

    ప్రత్యుత్తరంతొలగించు
  5. Thx Agnyaata, Vijayamohan, Kottapaali gaarlaki

    Will try to improve on the next one!

    ప్రత్యుత్తరంతొలగించు
  6. చాలా బాగుందండి... ప్రతీ సగటు స్వార్థపరుడైన పౌరిడికి చెప్పుతో కొట్టినట్టు ఉంది...

    ప్రత్యుత్తరంతొలగించు
  7. నేను సైతం చదివాను
    నేను సైతం అబినందిస్తున్నాను
    చాలా బాగుంది రౌడి కవిగారూ

    ప్రత్యుత్తరంతొలగించు
  8. చాలా బాగా రాసారు. మరి మీ కోపం గురితప్పుతో౦దా?

    ప్రత్యుత్తరంతొలగించు
  9. సగటు మానవుడి ఆవేదనా ఇది? చాలా చక్కగా అక్షర బద్ధం చేశారు. భాస్కర్ రామి రెడ్డి గారు..మీరు కూడా! .

    ప్రత్యుత్తరంతొలగించు
  10. భరత్వాజ్ గారు మీరు చాలా బాగా రాస్తారు.. మరెందుకని ఇలాంటివి ఎక్కువగా రాయరు.చాలా బాగుంది .

    ప్రత్యుత్తరంతొలగించు
  11. అయ్యో నాకంత సీన్ లేదండీ. అ రోజేదో కవిత చదివి ఆ మూడ్ లో వ్రాశానంతే. Thank you.

    ప్రత్యుత్తరంతొలగించు