31, జులై 2013, బుధవారం

మాలిక పత్రిక ఆషాడమాస సంచిక విడుదల




విభిన్నమైన, సరికొత్త అంశాలతో మాలిక పత్రిక ఆషాడమాస సంచిక విడుదల చేస్తున్నాం. ఇంతకుముందు ప్రారంభమైన సీరియల్స్ తో పాటు ఈ నెలనుండి ప్రముఖ రచయిత బ్నిం మూర్తిగారి  కధలను విందాం.. అవునండి చదవడం కాదు విందాం.. అలాగే ప్రముఖ కార్టూనిస్ట్ జయదేవ్ గారి గీతపదులు కూడా ఈ నెలనుండి మొదలవుతున్నాయి.. కినిగె నుండి ప్రతీనెల టాప్ టెన్ పుస్తకాల గురింఛిన వివరాలు అందించబడతాయి..  దీనివలన కొత్త పుస్తకాల గురించిన సమాచారం తెలియవస్తుంది. కొనాలనుకున్నవాళ్లు కొనుక్కోవచ్చు.


ఇక మాలిక పత్రిక తరఫున మరో ముఖ్య ప్రకటన..
తెలుగు బ్లాగులు, వికీపీడియాలో రాసేవారిని ప్రోత్సహించడానికి మాలిక పత్రిక ప్రతీనెల ఉత్తమ బ్లాగు టపా, ఉత్తమ వికీ టపాను ఎంపిక చేసి కినిగె వారి 116/- రూపాయిల గిఫ్ట్ కూపన్ బహుమతిగా అందిస్తుంది. ఈ కూపన్ సాయంతో మీరు కినిగెనుండి ఈబుక్ లేదా ప్రింట్ బుక్ కొనుక్కోవచ్చు..


మాలిక పత్రికకు రచనలు  ఈ చిరునామాకు పంపాలి.. editor@maalika.org



ఈ సంచికలోని విశేష వ్యాసాల వివరాలు:

0. సంపాదకీయం: స్నేహం ఒక వరం
1. కినిగె టాప్ టెన్
2. విదేశీకోడలు 
3. నల్లమోతు శ్రీధర్ వీడియోలు
4. రఘువంశము - 2
5. అనగనగా బ్నిం కధలు - 1
6. మాలిక పదచంద్రిక - 11
7. పారసీక చందస్సు - 3
8. జయదేవ్ గీతపదులు - 1
9. సంభవం - 3
10. అతడే ఆమె సైన్యం - 3
11. రక్షాబంధనం
12. జీవిత పాఠశాలలో నిరంతర విద్యార్ధి
13. చారిత్రక సాహిత్య కధామాలిక - 4

5, జులై 2013, శుక్రవారం

"ఊర్వశీ ఊర్వశీ" ట్యూన్లో వోటర్లపైన ఒక "ప్రేమికుడి" ఆక్రోశం :P





వోటరూ, వోటరూ టేకీటీసీ వోటరూ
నేతలు నిన్ను ఫూలు చేస్తే లైటుతీస్కో వోటరూ
నిన్ను వెధవని చెయ్యటమంటే వాళ్ళకి సింపుల్ మేటరూ .. 
నాయకుల..పే..కాటలోన నువ్వే అసలు జోకరూ ...

వోటరూ, వోటరూ టేకీటీసీ వోటరూ...

నీకసలు తెలుసా తెలుసా ఎమ్మెల్యే ఎంపీ నీవాళ్ళే
నువ్వు వోటింగ్ ఎగ్గొడితే మిగిలిన వోట్లతో గెలిచినాళ్ళే
అయినా నీకూ కావల్సింది టీవీలో హేరీ పాటరూ ..
దొంగవోట్లు ఎన్నిపడినా నువ్వు చెయ్యి బేఖాతరూ..

వోటరూ, వోటరూ టేకీటీసీ వోటరూ...

స్టేటునే విడగొడతామంటే ఈసీ కోస్తా వోటరూ
ఇప్పుడప్పుడే తేల్చము అంటే ఈసీ తెలంగాణా వోటరూ
నీది త్రిశంకు స్వర్గం అంటే ఈసీ రాయలసీమ వోటరూ
నెత్తిపై శఠగోపం పెడితే ఈసీ ఆంధ్రప్రదేశ్వోటరూ ...

వోటరూ, వోటరూ టేకీటీసీ వోటరూ...

కేడర్లు గుడినే మింగేస్తే... లీడర్లు లింగం మింగునులే
అందులో నీక్కాస్త పడవేస్తే... నీ మెదడు వైట్-వాష్ అవ్వునులే
నువ్వు ఇక బక్రా అయిపోతే... నీకసలు ఫికరే అక్కరలే
ఏదో ఒక ఫ్రీ స్కీమే పెడితే...  నీ కుక్క తోకే వంకరలే 

వోటుకింతని రొఖ్ఖం ఇస్తే పండగ చేస్కో వోటరూ
ఫుల్లుగా మందేపోయిస్తే ఎంజాయ్ చెయ్యి వోటరూ
గెలిచినాక టాటా చెబితే ఏడ్చుకో ఇక వోటరూ
అయిదేళ్ళయ్యాక కనిపిస్తే అంతా మర్చిపో వోటరూ

వోటరూ, వోటరూ టేకీటీసీ వోటరూ...

నువ్వు నేతలపై అలిగేస్తే... వెంటనే క్రికెట్ మేచ్ ఖాయం
దానిలో ఇండియా గెలిచేస్తే... నీకున్న కోపం మటుమాయం..
నీవల్ల గెలిచిన వారైతే నీకసలు చెయ్యరుగా సాయం
అసలు కారకుడివి నువ్వేగా.. నీకింక తప్పదు ఈ న్యాయం!

3, జులై 2013, బుధవారం

శంకరశాస్త్రి టిఫిన్!




 ఒక రోజు శంకరశాస్త్రిగారో టిఫిన్ సెంటర్కి వెళ్ళారు. ఆయన చెప్పినదాన్ని సెర్వర్ ఒక పట్టాన తీసుకురాకపోయేసరికి కాస్త దీనంగా, కాస్త కోపంగా "శంకరా! నాదశరీరాపరా" ట్యూనులో ఈ పేరడీ ఎత్తుకున్నారు.

 పల్లవి:
 సెర్వరా! నాన్చుడు ఇక ఆపరా..
వేగముగా సాగరా
టిఫిన్ తీసుకురా...!

 సెర్వరా!
నాన్చుడు ఇక ఆపరా..
వేగముగా సాగరా
టిఫిన్ తీసుకురా...!

 చరణం 1:

 గారెలు ఎఱుపని, ఆవడ తెలుపని
మూకుడే నలుపుయనీ ...
నిన్నటి పుల్లని పెఱుగును కలిపితే
 గారెనే ఆవడనీ ..

 గారెలు ఎఱుపని, ఆవడ తెలుపని
మూకుడే నలుపుయనీ ...
 నిన్నటి పుల్లని పెఱుగును కలిపితే
 గారెనే ఆవడనీ ..

పాకపు కిటుకులు తెలిసినవాడవు మరోనలుడవు నీవైతే ... 
పాకపు కిటుకులు తెలిసినవాడవు మరోనలుడవు నీవైతే ...

 ఇడ్లీ పూరి బిసిబెళేబాత్ ఉప్మా 
మఱువరా నీవు మఱువరా
కుక్కులెరుగనీ కొత్తవంటకం
స్వయంశక్తితో చేసిపెట్టరా .. వేసిపెట్టరా...

 సెర్వరా!
 నాన్చుడు ఇక ఆపరా..
వేగముగా సాగరా
టిఫిన్ తీసుకురా...!

 చరణం 2:

 ఉడికే కుడుములు అతివకు గుచ్చిన మన్మథ చూపులు కాబోలూ ..
వేగే పుణుకులు నరకపు యమునికి చిక్కిన పాపులు కాబోలూ ..

 పెనం మీదపడవేయంగా .. చఱ్ఱున కాలెనుగదా వంగా...
 పెనం మీద పడవేయంగా .. చఱ్ఱున కాలెనుగదా వంగా...

 సాంబారే దానితో చేయంగా ... ఆ తలపుకే నానోరూరంగా ...

 ఆ ..ఆ .. ఆ.. ఆ.. ఆ.. ఆ.. ఆ.. ఆ.. ఆ..

 సెర్వరా! నాన్చుడు ఇక ఆపరా.. వేగముగా సాగరా టిఫిన్ తీసుకురా...! సెర్వరా! సెర్వరా!! సెర్వరా!!!